Auglýsingar á netinu er alltaf að fá meira vægi en áður í markaðsefni
fyrirtækja. Síðasta könnun ÍMARK meðal
markaðsstjóra gaf það meðal annars til kynna að flestir gerðu ráð fyrir að eyða
meira í markaðssetningu á netinu árið 2009 heldur en áður. Það hentar mörgum vörumerkjum að auglýsa á
netinu, þó er miðillinn mis mikilvægur eftir því hvaða vara og/eða þjónusta
er í boði.
Markmið með vefborða geta verið mismunandi en flestir vilja þó fá notendur
til að smella á auglýsinguna og skoða heimasíðu fyrirtækisins. Lendingarsíðan sem notendur fá upp þegar
smellt er á vefborða skiptir gríðarlega miklu máli. Ef notandinn finnur ekki
strax upplýsingar um það sem hann taldi sig vera fá skilaboð um í vefborðanum
getur það leitt til þess að hann nenni ekki að leita og gefist upp fljótlega á
síðu fyrirtækisins. Því getur verið dýrmætt fyrir tölvugúrúa fyrirtækja að vera
með á nótunum þegar vefborðar eru í loftinu og mæla tíma og hegðun hvers notanda inni á heimasíðunni
eftir að smellt hefur verið á vefborða.
Sem dæmi þá auglýsti fatamerki vörur sínar á netinu fyrir ekki svo
löngu. Í auglýsingunni var mynd af einni
vöru, ákveðinni tegund af peysu. Þegar
smellt var á auglýsinguna lenti notandinn á síðu sem innihélt alla vöruflokka
verslunarinnar. Notandinn sem hafði
hugsanlega áhuga á peysunni í
auglýsingunni þurfti þá að byrja að smella á nokkra linka til að sjá frekari
upplýsingar um hana. Lendingarsíðan var
þannig uppsett að þolinmæði notendans brast og var síðunni lokað fljótlega án
þess að peysan girnilega fyndist. Þetta
skilur óneitanlega eftir spurningar um hvort síðan sé nógu notendavæn, eða
hvort uppsetning hennar byggist meira á framleiðslu fyrirtækisins heldur en að selja vörurnar til hugsanlegra kaupenda.
Mikilvægur hluti þegar auglýst er á netinu er að fylgjast með og bregðast
við viðbrögðum notenda Þá kemur til
athugunar hlutfall smella miðað við hlutfall birtinga vefborða svokallað CTR
hlutfall (Click Through Rate). Það eru
margir þættir sem geta haft áhrif á þeta hlutfall. Það getur verið skilaboð vefborðans, hönnunin, val á birtingastað eða staðsetning á síðu. Mikilvægt er að fylgjast með frá upphafi ef
mögulegt er og bregðast við, hugsanlega breyta og bæta ef hlutfallið er ekki
ásættanlegt.
Erlendis þar sem fjöldi notenda er margfaldur á við það sem við þekkjum á
Íslandi er oft talið að ásættanlegt hlutfall sé 0,01 en aftur koma skilaboðin
eða tilboðið þar inní þegar viðmið eru athuguð. Ef um er að ræða
ákveðið tilboð í afmarkaðan tíma má áætla að hlutfallið sé nokkuð hærra. Einnig ef birtingarnar eru ofmargar lækkar
hlutfall smella og þar með CTR hlutfallið. Einnig tíðkast það víða erlendis að auglýsandinn greiði eftir fjölda
smella CPC- (Cost per click) eða eftir fjölda birtinga CPM (Cost per thousand)
og hafa íslenskir auglýsendur helst kynnst þessu þegar auglýst er á
Facebook. Hins vegar rukka flestir ef
ekki allir íslenskir miðlar fyrir þann tíma sem auglýsing er í birtingu, alveg
óháð því hversu margir smella á vefborðann eða hversu oft hann birtist.
Stundum er aðalmarkmiðið ekki endilega að ná sem flestum smellum heldur að
vekja athygli án þess að vilja endilega að notendur smelli.
Apple setti í loftið skemmtilega útfærslu inná fréttasíðu New York Times
fyrir skemmstu þar sem þeir keyptu þrjár staðsetningar inná sömu síðunni og létu
vefborðanna kallast á. Sýnishorn má sjá
hér. Hér er að sjálfsögðu gert ráð fyrir að
notendur séu með kveikt á hljóði því annars má ætla að skilboðin komist ekki
áleiðis.
Önnur svipuð og vel heppnum auglýsing frá Apple má sjá
hér.