Bandaríska raftækjaverslunin Best Buy setti á dögunum fram nýstárlegar kröfur fyrir umsækjendur um markaðsstarf hjá fyrirtækinu. Umsækjendur þurftu nefnilega, auk starfsreynslu og menntunar, að hafa minnst 250 fylgjendur á samskiptasíðunni Twitter en þess hefur ekki verið óskað áður í starfsumsókn  svo vitað sé. Forstjóri fyrirtækisins,  Brian Dunn, er mikill aðdáandi Twitters en sjálfur hefur hann um 1.700 fylgjendur.  Nýverið  hvatti hann  viðskiptavini og fjárfesta í fyrirtækinu, sem ekki gátu mætt á ársfund, til að fylgjast með framvindu hans á Twitter. Ekki fylgir sögunni hve margir fylgdust með ársfundinum á Twitter en búið er að ráða í starfið sem auglýst var til umsóknar.