Nú er ár liðið síðan fyrstu gögn komu úr rafrænum ljósvakamælingum (PPM mælingar) Capacent og við hófum að setja birtingaáætlanir upp í Infosys forritinu sem hýsir PPM gögnin. Það var bylting að fá nýjar tölur vikulega. Nú eru áætlaðar dekkunar- og tíðni tölur uppfærðar vikulega meðan plön eru enn í gangi og því  möguleiki að uppfæra birtingaplön ef þörf er. Nýir dagskrárliðir fá mælingu strax og eru því ekki óþekktar stærðir í gegnum heila seríu eins og gerðist stundum í dagbókamælingum. Þetta var ekki einungis bylting fyrir birtingastofur heldur einnig fyrir dagskrástjóra fjölmiðlanna sem geta nú aðlagað dagskrár út frá upplýsingum mælinganna. 

Nýjustu tölurnar eru frá vikunni 26.febrúar til 1.mars og skoðuðum við tvo hópa, 18 – 35 ára og 25 – 45 ára sem eru algengir markhópar fyrirtækja. Efstu þrír þættirnir voru eins hjá báðum hópum, þar kom RÚV inn með Söngvakeppnina og Spaugstofuna. Hrúturinn Hreinn kom svo í þriðja sæti, þessi þáttur er sýndur á meðan kosningu stendur í söngvakeppninni og sýnir að fólk er ekki að skipta mikið á milli stöðva fyrir seinni hluta söngvakeppninnar. Einnig er spurningaþátturinn Útsvar að gera góða hluti og kemst á topp 10 hjá báðum hópum.

Á Stöð 2 er íslenska lögfræðidramað Réttur að koma vel út, sem og nýji þáttur Audda og Sveppa. Sjálfstætt fólk,  American idol og Cold Case eru þættir sem komast allir á topp 10. Ísland í dag og fréttir á Stöð 2 hafa verið að lækka sig lítilega miðað við vikurnar tvær á undan en Ísland í dag þó minna og var með meira áhorf en fréttir í báðum hópum. CSI og CSI Miami koma sterkastir inn á Skjá 1, sem og Dexter og One Tree Hill. Bílaþátturinn Top Gear byrjaði aftur í janúar og er sem fyrr að gera góða hluti, sá þáttur hefur verið að ná góðu áhorfi hjá mjög víðum hópi fyrir bílaþátt, til dæmis hjá konum 20 – 50 ára nær þátturinn 23,3% rtg á frumsýningu í síðustu viku.

Búast má við að íslenskir dagskrárliðir verði áberandi í febrúar þegar Idol Stjörnuleitin hefst á Stöð 2, framlag Íslands í Evrovision þetta árið verður valið á RÚV og Skjár 1 er að byrja með íslenska útgáfu af Fyndnum Fjölskyldumyndum. Gettu Betur kemur aftur á dagskrá RÚV og verður nú á laugardögum, í staðin fyrir föstudag líkt og fyrri ár. Auddi og Sveppi og Réttur halda áfram á Stöð 2. Káta Maskínan er komin yfir á Skjá 1 af RÚV og Umræðan, nýr þáttur í stjórn Sölva Tryggvasonar og Gunnhildar Gunnarsdóttir, hefst í febrúar. Í Umræðunni verða hin ýmsu málefni tekin fyrir. Einnig mun Sölvi stjórna spjallþætti sem verður á dagskrá á laugardagskvöldum.   Ítarlegri áhorfsgreiningu fyrir viku 5 er að finna hér.