Á síðustu vikum hefur mikið verið spáð og spekúlerað með fjölmiðla landsins og hefur ríkt nokkur óvissa um framtíð margra þeirra. Ekki hafa þó neinar stórkostlegar breytingar átt sér stað eftir að 24 stundir var tekið af dagblaðamarkaði og Skjár 1 ákvað að halda áfram útsendingum sínum.   Fréttablaðið boðaði þó smá breytingar í dag, en helgarútgáfa þess mun taka breytingum frá og með næstu helgi.  

Hér eftir mun Fréttablaðið einunigs koma út á laugardögum um helgar og fækkar því blöðunum um eitt yfir vikuna. Laugardagsútgáfan mun taka nokkrum breytingum en stefnan er tekin á veglegt helgarblað. Helgarblaðið mun meðal annars innihalda atvinnublað, Heimili og hönnun ásamt mánaðarlegum sérblöðum Fréttablaðsins sem hafa hingað til fylgt sunnudagsblöðunum. Sérblöðin fjalla meðal annars um menningu, ferðalög, mat og fjölskylduna.  

Morgunblaðið er nú eina dagblaðið sem gefur út blað á sunnudögum.  Vikulega tímaritið Dagskrá vikunnar hefur hætt útgáfu sinni.